د. علي منير حرب

مونتريال –  20/9/2015

ليش عيونِك دبلانينْ؟    وبعدِك بعمرْ العشرينْ

يمكِنْ طوّلتِ السهرة     عشبابيك العشّاقينْ

ديري بالِك عَعْيونِك      والسِحرْ التَحْتْ جفونِكْ

ربّي من عنده يصونِكْ   بعدِك بعمرْ العشرينْ

                  انشالله بضلّي عشرينْ

خدودْ الوردْ المطفيّة     لطلّوا صدفة عليّ

لوننْ مخطوفْ وباهتْ    شو القصة يا حورية!

مبارحْ كانوا جوزْ قمارْ   بِضوّوا بالسهريّة

ليش الحب بيكسرنا      ونحنا بعمر العشرينْ؟

                 انشالله بضلّي عشرينْ

قلبِك بعده بعمرْ الزهرْ    والدنيي غامرها غمرْ

لا تخلّي القدّْ الميّاس     يتلوّى بنيران الجمرْ

بعدِك عالحبْ صغيرة     وقدّامِك مشوارْ العمرْ

حطّي قلبِك بعقلِك         تيبقى عطرْ العشرينْ

انشالله بضلّي عشرينْ   انشالله بضلّي عشرينْ