بقلم د. علي منير حرب
لمناسبة عيد الأم آذار / مارس ٢٠٢١
إمّي يا أحلى اسم عا تِمّي
اسمكْ صلا، خيرِكْ مِلا
هالكونْ يا إمّي
إمّي يا أطهرْ اسم عا تمّي
*****
بِدْعي يا أمّ الخيرْ وبْصلّي
تضوّي حنانْ وحبّْ وتضلّي
شمسْ الدني الما غابتْ ولا يومْ
بعزّ الهنا بعزّ الضنى
عاطولْ بتهِلّي
إمّي يا أطهر اسم عا تمّي
*****
كبرتْ، تعبتْ كتير من همّي
دِقتْ الحلوْ والمرّ يا إمّي
ولما سألني الشيبْ شو تمنيتْ
رديتْ: عبّي كلْ ما لاقيتْ
وردّْني إغفا عا صدر إمّي
إمّي يا أطهرْ اسم عا تمّي
*****
الأمْ دنيي حبّها بيعمّْ
بوسعْ السما أولادَها بتضمّ
هيّ المحبة بتجمعْ وبتلمّ
يا جنّة الجنّات يا إمّي
إمّي يا أطهر اسم عا تمّي
*****
عا قدْ ما تعبْتِ أنا وصغيرْ
عا قدْ ما بحبِّك كلْ ما إكبرْ
يا ربّ تعطيني عمرْ بعدْ كتيرْ
تيساع عمري وحبها أكثرْ
ويغمرْ رضاكِ العمرْ يا إمّي
إمّي يا أحلى وأطهر اسم عا تمّي
**********