وفي الثامنة والسبعين بكى في عيد ميلاده

لمناسبة الذكرى الثامنة والسبعين لاستقلال لبنان

2021/11/22

 

ضايعْ أنا يا رب لاقيني

شطوطْ الدِني ما عادْ تأويني

ريشةْ إله الحبْ رسْمِتني

وعرشو جمال الربّ عَ جبيني

يا ربّ شمسك هجرتْ ربوعي

وهاجت رماح سموم ترميني

وَدّي جبالْ الموجْ والطوفان

وخدني عٓ مركب نوح واشلَحْني

وعَ جناحْ أرزة بحضنك ارميني

******

 

عمرْ الدني من رفاق عمري يا زمنْ

من قبل ما آدم بإيدْ ربّو ينعجنْ

من ترابْ أرضي انجبلتْ الطيناتْ

وكانت جبالي تغازلْ النجماتْ

وتوزّع التفاح بجنّة عدنْ

******

 

رزنامة الأيام عمْ تشهد عليّ

بأولْ وعيها ضحكتْ بعينيّ

وألوفْ بعد ألوف كرّت عإيديّ

ومتلْ ما توقّفْ زمان الدهرْ

بمهد المسيح يعيدْ عدّ العمرْ

وقِّفْ عَ بابي سنين هالتاريخ

تتبلِّش من الصفرْ بعد هالميّة

******

 

مشلّعْ يتيمْ وضايعْ بهالكونْ

وجِّي نكرْ وجِّي ولوني عِصي عَ اللونْ

وضاعتْ هويتي بين حابلْ ونابلْ

لساني نسي حروفو وحطّ ببابلْ

ودمّي انهدرْ ما بين عيسى وبين أحمد

ساحْ وصار بين الأسودْ وأسودْ

داير تإشحدْ بين هونْ وهونْ

******

 

ما عدتْ أعرف وين شرق وغربْ

لا عرفت دربي ولا عرفني الدربْ

لا مينْ عندي ولا عليّ أو معي

لا مينْ يبكيني أو يمسّح مدمعي

دخْلكْ يا ربّ الكون سامحني

ما عاد طبْ الروح يسعفني

كلهم يوضاس يا ربي

وسيوفهم طعنات بقلبي

وخشباتهم متشوّقة للصلبْ

******

 

عمْ إسألكْ يا ربْ والإيمانْ

عامر بقلبي بعدْلكْ وعطفكْ

وين كان واقف بعد منٌي هالزمانْ

ناطرْ شي موجة لطفْ من لطفكْ؟

لو ما يجي لكلْ الدني شريانْ

حاملْ بدمّو روحْ من صنعكْ

يزرعْ حضارة ويرفع البنيانْ

وكوكبْ يشعّْ النور…إسمو وطنْ لبنانْ

***********************